મેટોડા જીઆઇડીસીના શેડમાંથી રૂા.13.75 લાખનો અંગ્રેજી દારૂ ઝડપાયો

રંગના પોલીકેમ નામના કારખાનામાં દરોડો પાડતા 5232 બોટલ અંગ્રેજી દારૂની મળી આવી : જુનાગઢમાંથી ઝડપાયેલ દારૂનો આરોપી શોધવા માટે લોધીકા પોલીસની ટીમ સાથે ગઇ હોય ત્યારે આ દારૂનો જથ્થો ઝડપાયો

રાજકોટ: જુનાગઢમાંથી અગાઉ ઝડપાયેલ અંગ્રેજી દારૂના જથ્થાનો આરોપી લોધીકાના મેટોડા જીઆઇડીસીમાં વિસ્તારમાં હોવાની હકીકતના આધારે જુનાગઢ પોલીસે લોધીકા પોલીસને સાથે રાખી તપાસ હાથ ધરી હતી. દરમ્યાન એક કારખાનામાં શંકાના આધારે દરોડો પાડતા ત્યાંથી અંગ્રેજી દારૂની વધુ 5232 બોટલ મળી આવતા રૂા.13.75 લાખનો મુદામાલ કબ્જે કરવામાં આવ્યો છે.

મળતી માહિતી મુજબ જુનાગઢ તાલુકા પોલીસે અગાઉ તેમના વિસ્તારમાંથી અંગ્રેજી દારૂ ઝડપી પાડયો હતો. જે દારૂના ગુનાનો આરોપી મેટોડા જીઆઇડીસીના એક કારખાનામાં છુપાયેલો હોય તેવી બાતમીના આધારે મેટોડા આવી લોધીકા પોલીસને સાથે રાખી તપાસનો ધમધમાટ શરૂ કરવામાં આવ્યો હતો. દરમ્યાન ગેઇટ નં.1ની અંદર આવેલા રંગના પોલીકેમ નામના કારખાનામાં શંકાના આધારે દરોડો પાડતા ત્યાંથી અંગ્રેજી દારૂની 5232 બોટલ કિ.રૂા.13,75,200/-ની મળી આવી હતી. જેથી પોલીસે વધુ તપાસ કરતા આ દારૂ આસ્થા વિલેજ બ્લોક મેટોડા જીઆઇડીસીમાં રહેતા અશોક રામસ્વરૂપ બિશ્ર્નોઇનો હોવાનું જાણવા મળતા તેની શોધખોળ કરવામાં આવી હતી. પરંતુ તેનો ક્યાંય પતો ન લાગતા પોલીસે તેની સામે ગુનો દાખલ કરી શોધખોળ હાથ ધરી છે.